La Nueva España – Cartas – LInxeniería dOrganización Industrial y lExércitu

Ver original

LInxeniería dOrganización Industrial y lExércitu

29 de Enero del 2018 – Raúl Suevos Barrero (Xixón)

Ta l’ambiente universitariu estos díes caberos un pocoñín enzarabieyáu cola negativa de la Consellería d’Educación y Cultura a poner los estudios d’Inxeniería d’Organización Industrial na Politéunica de Xixón. Del llau del non dizse que nun hai demanda, del otru retolicase que nun hai demanda porque nun hai au estudiala y que, sicasí, ye un área de munchu futuru y sedría perbon cuntar con esta Inxeniería n’Asturies. Too ello por esplicalo d’una manera cenciella.

Asturies, tierra d’onde colara’l xeneral Riego, nun tien muncha tradición militar nel sieglu caberu. Tres la Guerra incivil, y en llibertá condicional polos antecedentes izquierdistas y republicanos, nun yera territoriu au se dieren munches vocaciones y pa cuando aportó la democracia tampocu s’apreció un afloramientu de xente mozo con ganes d’emtamar l’oficiu de les armes. Per otru llau, la Fábrica d’Armes de Trubia entró nuna dinámica de privatización y amenorgamientu que la fixo perder gran parte del trabayu y el prestixu con que contaba. Güei ye un tallerón de Santa Bárbara Sistemes onde se vive a la espera d’algún encargu que la caltenga abierta.

El Reximientu del Príncipe, el de nueso, cola desapaición de la mili, el serviciu militar obligatoriu que facíen los xóvenes españoles, culpable según dicíen de que s’arimaren a les bébores alcoholiques y a los porros, y tamién de cohesionar el país según se ve, quedó mui tocáu, el casu ye que la profesionalización del Exércitu español coincidió con los años meyores de l’economía española, yeren los años del Gobiernu Aznar, y la xente mozo nun taba pol llabor de metese a soldáu.

Anguaño, la conxunción de tres factores –la crisis, los sueldos meyores nel Exércitu y l’atraición de les misiones internacionales– fai que’l Reximientu trabaye a plantilla completa y con mayoría de personal asturianu. Esto ye un fechu.

El casu ye, y equí tornamos a l’Inxeniería, que los oficiales del Exércitu fórmense na Academia Xeneral Militar de Zaragoza, aú s’aporta pente medies d’un concursu oposición pal que cuenta y da puntos los estudios de Inxeniería d’Organización Industrial, que son los que van estudiar nos cinco años que s’enllarga la carrera.

Los alumnos, llámenlos cadetes, entren per dos víes, la direuta del sistema de enseñamientu regláu y la de promoción interna, esto ye, de soldaos o suboficiales. Nos dos casos, pa esi comentáu concursu oposición van conta-yos les asignatures que trayan aprobaes de la cai, nel casu asturianu, de la Politéunica de Xixón si tuviere esos estudios.

Ye bien seguro qu’estos datos nun son de trescendencia descomanada, pero pienso que, n’alguna midida, puen axudar na toma de decisión del señor conseyeru.”

Anuncios

Acerca de ensantabarbara

"Asociación 55 despedidos - Fábrica de Trubia" Trabajadores despedidos de la filial española de General Dynamics European Land Systems
Galería | Esta entrada fue publicada en Hemeroteca, Reflexiones y etiquetada , . Guarda el enlace permanente.